الاثنين, مايو 19, 2014
Mustafa
كتبت الناشطة نوارة نجم عبر الفيس بوك رسالة لعبدالله عاصم المخترع الصغير جاء فيها
اوعى ترجع يا حبيبي... ربنا يوفقك ويبارك لك في ذكاءك وعبقريتك وعلمك وينجيك انت رحت عند اللي حيعرفوا قيمتك وان شاء الله يساعدوك ويعلموك ويوفروا لك كل احتياجاتك عشان تصقل عبقريتك بالعلم، احنا مش وش عباقرة ولا وش اختراعات احنا كفاية علينا العاهات الذهنية اللي بتطلع في الاعلام تشتمك وانا مش انسانة شريرة عشان ادعي عليهم يشرفوا هم كمان في امن الدولة ونشوفهم حيقعدوا في البلد ولا لا؟ الانسانية محتاجة علمك ومش ذتبك ولا ذنب البشرية انك اتولدت في بلد حراس الوطن اللي فيها بيعذبوا العباقرة عشان يكافحوا الارهاب قول الحمد لله انك نفدت.. وابعت هات اهلك يعيشوا معاك بدل ما يقرفوهم هنا، وابعد يا عبد الله.. ابعد خالص وانسانا، ولا تبص علينا على الخريطة... ولا تعتب البلد دي قبل ما تاخد جايزة نوبل... وحتاخدها ان شاء الله، ولما تاخدها العاهات الذهنية اللي بيشتموك دلوقت حيقولوا العالم المصري الكبير ويتصوروا جنبك زي ما بيتصوروا جنب الدبابة... وارجع تاني واقول انا مش انسانة شريرة عشان اقول يارب اللي يشتمك ابنه يتعكش في امن الدولة عشان يورينا الوطنية ساعتها.. انت عالم عبقري، كفاحك ونضالك في الدنيا انك تفيد البشرية بعلمك مش انك تقعد هنا تخيب جنب بتوع الاكس افاكسورز.. تقعد تعمل ايه؟ تناضل عشان يتقال عليك نوشتاء السبوبة ولا يجيلك تخلف من البيروقراطية ولا تتهبل وتتكلم عن المؤامرة؟ مع السلامة يا عبد الله.. ما تبصش وراك ولا تفكر في منزل العائلة المسمومة ده تاني... ربنا فك اسرك اوعى ترجع لبيت الاشباح بعد ما ربنا عفا عنك
